Rojhalat

بۆکان ساڵی 1330 وێنه‌گر: سمایل خانی فه‌روخی

ئه‌م زنجیره‌ وتارانه‌ به‌ ئامانجی دۆزینه‌وه‌ و ناساندنی سه‌رچاوه‌ بۆ مێژووی سیاسی – کۆمه‌ڵایه‌تی – کولتووریی شاری بۆکان و ده‌وروبه‌ری ده‌نووسرێن. مێژووی ناوچه‌که‌ له‌دوای سه‌رهه‌ڵدانی ئیسلامه‌وه‌ تا سه‌رده‌می قاجاره‌کانی ئێران (سه‌ده‌ی هه‌ژده‌هه‌م)، له‌ گێژوگۆمیدایه‌ و هه‌موو سه‌رچاوه‌ مێژووییه‌ نووسراوه‌کان لێی بێده‌نگن.

هه‌وڵی من ئه‌وه‌یه‌ بتوانم پێش هه‌مووشت که‌ره‌سه‌یه‌کی تێر و ته‌سه‌ل بۆ توێژینه‌وه‌ی مێژووی بۆکان پێک بهێنم، ئینجا هه‌وڵ بده‌م ئاڵقه‌ی زانیارییه‌کان به‌یه‌که‌وه‌ ببه‌ستم. به‌ڵام ئه‌وه‌ی کاری من له‌ مێژوونووسان جیا ده‌کاته‌وه‌ ئه‌وه‌یه‌ هه‌موو ئه‌و که‌ره‌سه‌یه‌ی بۆ لێکۆڵینه‌وه‌کانی خۆمی ده‌دۆزمه‌وه‌، به‌ بینه‌ری ماڵپه‌ڕی بۆکان و خه‌ڵکانی تری ده‌ناسێنم ، واته‌ ئه‌وه‌ی خه‌ڵک به‌سرته ‌و چرپه‌ باسی ده‌که‌ن، من جاڕی ده‌ده‌م! هۆی کاره‌که‌ش ئه‌وه‌یه‌ ئه‌گه‌ر ته‌مه‌ن ئیجازه‌ی پێ نه‌دام کاره‌که‌م بگه‌ێینمه‌ ئه‌نجام، ئه‌وا لای که‌م کارهاسانیم بۆ که‌سانی تامه‌زرۆی مه‌سه‌له‌که‌ کردوه‌ و ڕێگام بۆ نزیک کردونه‌ته‌وه‌.

سه‌رچاوه‌کان به‌ گشتی کتێبن، به‌ڵام واهه‌یه‌ وتار، شریت، سی دی، فیلم یا که‌ره‌سه‌ی دیکه‌ش بن و ماڵپه‌ری ئینترنێتیش بگرنه‌وه‌.

زۆرێک له‌و که‌سایه‌تییانه‌ی له‌ پێوه‌ندی بۆکاندا ناویان ده‌به‌م، واهه‌یه‌ خۆیان بۆکانی نه‌بن – بۆ نموونه‌، مامۆستا هه‌ژار، به‌ڵام ئه‌گه‌ر له‌ بۆکان ژیابێتن یا له‌ نووسین و به‌رهه‌مێکدا باسی بۆکانیان کردبێت، دێنه‌ ناو جوغزی کاره‌که‌ی منه‌وه‌. هه‌روه‌ها زۆر گوند یا دانێشتوانی گونده‌کانی ده‌ور و به‌ری بۆکان، واهه‌یه‌ ئه‌وه‌نده‌ی له‌ پێوه‌ندی شاری بۆکاندان، ئه‌وه‌نده‌ش پێوه‌ندیان به‌ سه‌قز یا مه‌هاباد و شاره‌کانی دیکه‌وه‌ هه‌بێت، من ناچمه‌ ناو کێشه‌ی ئه‌و بنه‌ما و بنه‌چه‌کانه‌وه‌ و خۆم له‌و ده‌مارگیرییه‌ نابه‌جێیه‌ دوور راگرم.

ئه‌م زنجیره‌ وتاره‌ له‌ ساڵی 2005 ده‌ستی پێکراوه‌. ئه‌نوه‌ر

ئاگادارییه‌ک بۆ خوێنه‌رانی بۆکان له‌ مێژوودا

ئه‌م زنجیره‌ وتاره‌ درێژه‌ی هه‌یه‌ و تا ژماره‌ی 66 ی ئاماده‌ کراوه‌. سه‌رچاوه‌کانی به‌رده‌ستی من واهه‌یه‌ تا ژماره‌ 200ش درێژه‌یان هه‌بێت، به‌ڵام کاره‌که‌ به‌وانه‌ کۆتایی نایه‌ت. له‌ گه‌لێک زمانی دیکه‌دا بابه‌ت له‌سه‌ر بۆکان هه‌یه‌. ئه‌وانه‌ی من ده‌ستم پێیان رابگات ته‌نیا کوردی و فارسی و ئینگلیزین له‌ کاتێکدا بێگومان گه‌لێک بابه‌ت به‌ زمانی عه‌ره‌بی، تورکی، فڕنسی، ئاڵمانی و زمانه‌کانی دیکه‌ی ناوچه‌ وه‌ک ئه‌رمه‌نی و سوریانی و عیبری هه‌ن که‌ من توانای ده‌ست پێراگه‌یشتن و خوێندنه‌وه‌یانم نییه‌.

تکا له‌ خوێنه‌ران ده‌که‌م هه‌ر بابه‌تێکی سه‌باره‌ت به‌ بۆکان له‌ کتێب، رۆژنامه‌، گۆڤار، ماڵپه‌ڕی ئینترنێتی یا ته‌نانه‌ت به‌رنامه‌ی رادیۆیی و ته‌له‌فیزیۆنی ده‌خوێننه‌وه‌، ده‌یبیسن یا ده‌یبینن کورته‌یه‌کی به‌ کوردی، فارسی یا ئینگلیزی له‌سه‌ر بنووسن و ئه‌گه‌ر ده‌کرێت کۆپییه‌ک له‌ تایبه‌تمه‌ندی سه‌رچاوه‌که‌ (لاپه‌ڕه‌، ئه‌گه‌ر کتێب بێت) بنێرن بۆ ئه‌م ئه‌درێسه‌ی خواره‌وه‌، من به‌ ناوی خۆیانه‌وه‌ بڵاوی ده‌که‌مه‌وه‌ :

یارمه‌تی ئێوه‌ بابه‌ته‌که‌ ده‌وڵه‌مه‌ند ده‌کات و له‌ ئه‌نجامدا به‌ کارێکی هه‌ره‌وه‌زی ده‌توانین سه‌رچاوه‌ی پێویست بۆ نووسینی مێژوویه‌کی ته‌سه‌لی بۆکان و ده‌وروبه‌ری له‌ دوارۆژدا ئاماده‌ بکه‌ین.

به‌ پێویستی ده‌زانم سپاس و رێزی خۆم ئاراسته‌ی سایتی ڕۆژهه‌ڵات / بۆکان به‌تایبه‌ت کاک نادری به‌ڕێز که‌ ئه‌رکی تایپ و بڵاوکردنه‌وه‌ی هه‌موو ژماره‌کانی ئه‌م زنجیره ‌وتاره‌ی له‌سه‌ر شان بووه‌ و به‌ ڕووخۆشیه‌وه‌ کاره‌که‌ی ڕاپه‌راندوه‌. له‌ راستیدا ئه‌رک و زه‌حمه‌تی ئه‌و به‌ڕێزانه‌ هه‌رگیز له‌ کاره‌که‌ی من نه‌ که‌متر به‌ڵکوو زیاتریش بووه‌. نموونه‌ی مرۆڤی وا خزمه‌تگوزاری کولتووری گه‌له‌که‌مان زۆر بێت.